終於揾到間似樣啲又喺安全區嘅屋，兩個未出發先興奮列哂要買乜乜乜廚房廁所用具。
雖然我眼腫佢鼻高，但我哋有同一嗜好就係煮飯仔。你洗菜時我刨芝士，好開心嫁。意大利人都興house party, 每逢佳節，初一十五，天氣好，總之永遠唔會有藉口唔邀請親戚朋友嚟屋企大拆一餐。入鄉隨俗，我哋喺香港嗰陣都久唔久請我家人品嚐正宗意大利菜(he’s a good chef!)
唔知點解一堆人九唔搭八做乜鬼要攞把尺去度兜lasagna!其實原因好簡單，你打開得屋企度門邀請得入去坐的，都係你最親嘅家人或值得信任嘅朋友，俾你煮九大簋又好，求其叫菠蘿腸仔到會也好，重點根本唔係food tasting而係time sharing. 有邊個可同你冇利益衝突底下盡數公司挨驢仔嘅陰公史？有邊個咁得閒可兩協插開酒刀陪你吹水吹通頂？
以前朝朝返工放工返屋企，超級媽都準時過晚間新聞打嚟問返唔返嚟食，要夜啲先收工啊？留返俾你洗唔洗？我屋企同朋友每個月都總有壽星飯食，食吓笑吓，笑完再食，食飽再笑。離開香港後，我已經好耐冇陪佢哋唱生日歌，好耐冇一家人坐埋一齊食飯了。
出走了兩年多，請相信我，有屋企唔代表晚晚有人煮埋你飯仲有得set飯鐘，做朋友唔一定下下能放下情緒聽你狗噏成晚，有的話請好好珍惜，因為有佢哋陪你time sharing，陪你一齊渡過生活中嘅喜與悲，係你嘅福氣。
又到weekend了，我好想食超級媽的招牌冬姑蒸肉餅。如果平日返工太忙，不如試下留返一晚返屋企食個飯吖。
#招牌冬菇蒸肉餅
#italianhouseparty
Search